Antesedente:

Timór-Leste sofre perigu naturál oioin, hanesan bee-sa’e, bailoro-naruk, laloran aas, rai-nakdoko no tsunami. Matenek-na’in klimatolojia nian sira si’ik katak klima iha rejiaun ne’e sei bele sai manas no maran, hodi hamosu bailoro-naruk no udan boot liután ne’ebé la hatene tuir nia tempu, ne’ebé bele hamosu bee-sa’e iha fatin-fatin. Rai sira ho altitude baixa iha rejiaun ne’e vulnerável tebetebes ba fenómenu mudansa klimátika, hanesan nivel tasi-been sa’e, erosaun kosteira no aho-ruin sira sai kamutis. Agora iha prova maka’as ne’ebé hatudu katak mudansa sira iha kondisaun tempu, ne’ebé iha relasaun ho mudansa klimátika, sei habo’ot posibilidade no intensidade ba dezastre naturais atu mosu iha rai-laran tomak. Paíz ne’e mós esperimenta efeitus síklikus anomalia klimátika ne’ebe relasionadu ho El Niño/Sourthern Oscillation (ENSO). Inundasaun sei bele hamenus produsaun agríkula, halo aat infraestrutura, no liu-liu iha fatin sira be baibain mosu inundasaun, komunidade sira lakon hela-fatin no lakon riku-soi no meiu-subsisténsia (buka-moris). Ba kazu sira bee-sa’e, komportamentu basias idrográfikas asosiadu ho dezastre sira ne’ebé afeta ema nia vida no buka-moris. Habadak lia, komunidade sira sei falta koñesimentu no konxiénsia kona-ba perigu naturais, mudansa klimátika no adaptasaun, no preparasaun ba dezastre.

Rezumu:

USAID ninia atividade sira Redusaun Risku Dezastre (RRD) iha Timór-Leste foka ba iha distritu lima ne’ebé vulnerável tebes ba dezastre.  Serbisu ho Governu Timór-Leste (G-TL), USAID ninia programa Redusaun Risku Dezastre (RRD) uza prátika di’ak sira ne’ebé mundu tomak aseita ona, atu tulun komunidade rurál sira oinsá atu hamenus impaktu hosi dezastre liuhosi kapasitasaun, edukasaun, no apoia fundu ki’ik.  Iha nivél nasionál no distritu, USAID tulun ofisiais sira atu prepara-an ba emerjénsia sira ne’ebé sei bele mosu derepente liuhosi organiza formasaun CORE (common operational response essentials).  Ezersísiu simulasaun ne’ebé hala’o ona iha distritu sira lori hamutuk tiha ekipa sokorru sira nasionál no lokál atu kompriende di’ak liután saida maka bele mosu durante eventu krize ruma no atu dezenvolve planu asaun hamutuk. USAID ninia programa Redusaun Risku Dezastre (RRD) habo’ot kapasidade autoridade no komunidade timoroan sira nian atu reduz risku dezastre no jere resposta dezastre liuhosi mekanismu sira tuirmai:

1. Estratéjia – atu garante katak G-TL iha estratéjia formál no atualizada ida kona-ba RRD;
2. Mitigasaun – atu garante katak komunidade sira iha kapasidade atu hetan informasaun no uza fundu ki’ik atu halo atividade sira relasionadu ho RRD; no
3. Kapasitasaun – atu garante katak G-TL, parseiru sira iha nivél distritu no lokál utiliza duni formasaun kona-ba resposta emerjénsia no preparasaun dezastre.